[东方报]世界盃：死亡F組終章掀高潮日本旋風擊飛瑞典[06-25]

                               
登录/注册后可看大图

世盃F組最後1輪爭出線生死戰，日本激鬥瑞典！日本喺世盃掀起一股「爆裂旋風」，攻擊力強勁之餘行軍更迅速流暢，上仗大勝突尼西亞4比0，目前有4分在手，出線形勢佔上風，加上日本屬於「歐洲剋星」，近10次對歐洲球隊，法定時間取得8勝2和，必定乘勝追擊，贏埋剛遭遇慘敗嘅瑞典，一於直取主勝。(Now 619及617周五早上7時直播)

F組包尾嘅突尼西亞已篤定出局，荷蘭、日本同得4分，比瑞典多1分，換言之，日本今場和波都可以出線。不過，呢支亞洲勁旅以鬥心強見稱，踢法技術速度兼備，一向搏到盡，相信仍然會以贏波為目標，保持氣勢。

戰力世界級專劏歐洲兵
事實上，日本實力已可媲美世界一線強隊，眾多球評家及名宿包括伊巴謙莫域，更公開表明唔好再當呢股「爆裂旋風」係奇兵，要視佢哋為爭標熱門之一。尤其日本遇上歐洲兵團，表現特別出色，近10次對歐洲隊法定時間不敗，並贏咗8次，當中唔少對手係傳統勁旅，包括上屆世盃分組賽擊敗2支前冠軍得主德國、西班牙；睇埋日本今年4月熱身賽贏英格蘭，今屆世盃同荷蘭打和2比2，仲未計上年熱身賽反勝巴西3比2，各項賽事近8場取得7勝1和，銳不可當，對住水準飄忽嘅瑞典，相信可以佔上風。

另邊廂，瑞典即使擁有2位英超著名射手約基利斯、阿歷山大伊沙克，但防線人腳欠佳，導致陣容「頭重腳輕」，遇上弱隊尚且可以發揮鋒線威力，包括今屆首場大勝非洲球隊突尼西亞5比1，但上仗對荷蘭立即現形慘敗1比5。日本實力同荷蘭不相伯仲，可以想像到瑞典屆時應會陷入劣勢，可能又輸1場。