[东方报]世界盃：冠軍級勁旅一味鬥攻 法西摘星大作戰[07-14]

                               
登录/注册后可看大图

今晚世盃4強，法國激鬥西班牙上演摘「星」之戰。雙方都屬於進攻型勁旅，上屆亞軍法國擁有鋒線「夢幻三叉戟」，可謂無堅不摧。至於「狂牛兵團」上年歐國聯轟入法國5球，無懼同對手駁火，兩軍為爭取世盃冠軍喺隊徽「加星」，4強肯定搏甩髀，2.5球嘅入球大好穩陣。（ViuTV 99、Now618及616周三凌晨3時直播）

法國今屆表現堪稱無懈可擊，6戰全勝合共轟入16球，甚至提早穩奪小組出線權情況下，仍然冇留力以4比1大炒挪威，球員鬥心一流，皆因法國上屆決賽互射12碼不敵阿根廷，輸得唔抵，捲土重來爭標決心更加強。隊長基利安麥巴比着晒火，6場都以正選上陣，其中5場有波入，合共8球進帳，就算對挪威食白果，但都貢獻2次助攻，「麥總」殺得勝起，恐怕西班牙防線未必招架得住。

法國最犀利地方係周身刀、張張利，除咗麥巴比之外，奧士文尼迪比利腳風亦非常順，今屆已入5球及2次助攻，加上有6次助攻嘅米高奧利斯，三箭齊發，絕對係任何後衞嘅噩夢。

另邊廂，西班牙首仗遭佛得角守和0比0，的確曾經令人失望，但呢支2024年歐國盃冠軍始終根基深厚，其後愈戰愈勇，取得5連勝，當中4場上半場有波入。前鋒奧耶沙巴爾有4球進帳，固然係大殺傷力武器，翼鋒拉明耶馬盤扭傳射技術出眾，令對手防不勝防。最令人驚喜係中場米基爾馬連奴近2場後備上陣都攻入致勝1球，隨時又扮演救世主。

近年交手例多波入
值得留意，西班牙近4次對法國，取得3勝1負，包括兩年前歐國盃4強，西班牙贏2比1，上年歐國聯4強，雙方合演入球騷，「狂牛」以5比4勝出。近年對賽往績，西班牙有優勢，同時見到兩隊即使去到4強，亦唔會畏首畏尾，參考兩隊近3次碰頭總入球全開3球或以上，首選2.5球嘅大盤。